Арктикана илена не” коронавирус матнама’ пуд ханзер” иландо’ нензейвомам’ тохоламбава
_edited.png)
Проект нямна
Тюку исследовательской проект коронавирус матнама’ пуд ила ханзер” нензэйвомам’ манэ”ма е”эмня сертавы. Арктика’ няна тикы ӈылека хабця’ пуд не” тэнз’ ила ханзер” хэвам’, государство тикы’ няю ханзер” ненэцие’ нядабавам’ проектахана тохоламбангу”.
Проектахана мэна ученой” ханзер” хуркари ё’ тиӈгэвна Арктикана иленя не” нядабавамдо’ тохоламбаӈгу”. Ӈани’ вэвако хабця матнаб”, тикы манэ”мыдо’ нядмяць сяхари ненэцие’ сававна няда пирта”. Ненэйвавна Арктикана иленя не” нядабаб” тараӈгу”.
Проектм’ минрена” ханяна манзараӈгу”
Гренландия, Исландия таддикахад мале’ сян ё’ (Канада, Норвегия, Россия, США, Швеция, Финляндия) ӈэрм’ няӈы пелдо’ Арктической регионӈэ нюмдебада”. Тикы яхана хуркари закон” таня”. Хусувэй яхана тикыдо’ ӈоб толас ни ӈа.
Тарем’ сертабадидо’ илева’ ямбан’ Арктикана мэна ненэцие’ е”эмня ӈадимдембидо’.
Проектм’ минрена” няхар” яхана манзараӈгу”. Тикы Исландияхана ӈэда Акюрейри, Аляска, Ненэй ненэцие’ автономной округ. Тикы няхар” тарана арктической модельӈэ вадета”. Нюбедо’ ти:
· «Скандинавской Арктика»,
· «Североамериканской Арктика»,
· «Российской Арктика».
Проектахана манзарана”
Проектахана манзарана тодо’ ученой” тэнз”. Тикы хуркари социальной наукахана манзарана, Арктикана иленя ненэцие’ поӈгат мэна, Ӈэрм’ тер” ила’ саирм’ хамедамбада ученой”.
Тикы’ хавна проектахана социальной наука” тохоламбада студент” таня”. Пыдо’ сяхари Арктикана манзарана ӈэбто’, проектахана мэсь манэ”мыдо’ пэрманда манзаяханандо’ сиддо’ табедамбаӈгу”.
.png)